Gaur, Iñaki Cembranok A punto de ebullición antzerki obra eskainiko du Anzaran Auzo Elkartearen egoitzan, Lakaxita gaztetxeak eta Anzaran eta San Migel auzo elkarteek antolatzen duten auzo antzerki zikloaren barruan. Antzezlanak “zientzialari ero batek” etengabeko hazkundearen mitoak munduan izan ditzakeen ondorioetaz dituen burutazioak kontatzen ditu.

Hilaren 25ean Pirritx eta Porrotx & Bonberenea Txaranga haurrentzako ikuskizuna egingo dute arratsaldeko bostetatik aurrera Itsas Etxeko auditorioan. Sarrerak gaurtik jarri dituzte salgai Arma plazako eta kirol kaiko turismo bulegoetan. Goizez eta arratsaldez irekita daude turismo bulego horiek, eta sarrerek bost euroko prezioa dutela jakinarazi dute.

Ligako azken aurreko partida jokatuko du bihar Erregional Ohorezko Mailako Hondarribiko futbol taldeak Real Union Bren aurka Irunen; eskualdeko derbia da. Partida 15:30etik aurrera izango da Irungo Gal futbol zelaian.

Euskal preso eta iheslarien eskubideen aldeko aldarriak hartuko ditu bihar Euskal Herriko 200 plaza baino gehiago. Herrirak deituta, Goazen plazara ekimenak “plazak betetzea, kartzelak hustutzeko” du helburu. Ikerne Zarate / Errenteria-Orereta Herrira Mugimenduak Goazen plazara ekimena deitu du biharko. Horren harira Euskal Herri osoko herrietako plazak, euskal preso eta iheslarien eskubideen aldeko aldarriaren bilgune bilakatuko dira. [...]