VI. Ekozinemaldia martxan da dagoeneko. Ingurumenarekin lotutako askotariko gaiak aztertzen ditu zinemaldi horrek, eta aurten baliabideen gaineko filmak proiektatuko dituzte Irunen eta Errenteria-Oreretan. Bi hirietan bihar hasiko dira emanaldiekin: lehenengoan, Oky Doky tabernan, 18:00etan; eta bigarrenean, Mikelazulo Kultur Elkartean, 19:30ean.
Ekologistak Martxan dago zinemaldiaren atzean, eta elkartearen esanetan, horrelako egitasmoak “ezinbestekoak” dira gertatzen ari dena ezagutzeko. Hala, krisi ekonomikoaz gain, baliabideen krisia ere badela iritzi dio elkarteak, hala nola, petrolioa, gasa, uranioa eta metalena: “Inoiz ez dituzte kontuan hartu baliabide horiek ustiatzeak eragin ditzakeen kalteak”. Era berean, jendeari baliabideak lapurtzen dizkiotela salatu du.
Hori gertutik ezagutzeko filmak emango dituzte, beraz, datozen egunotan. Honakoak dira:
‘Amanece dignidad’
Multinazionalak Latinoamerikara iristeak aurrerapena eta herritarren bizi kalitatea hobetzea ekarriko zuela uste bazuten ere, ingurumenean eta gizartean inpaktu handia eragin dutela erakusten du filmak, Bolivia, Ekuador eta Venezuelako hiru adibideren bidez.
‘Sucumbios’
Chevron-Texaco taldeak Amazonian eragindako kalteen kontrako mugimendua azaltzen du.
‘La tubería’
Gas naturalaren hoditeria bat jarri nahi dutela eta, Irlanda ipar ekialdeko herri bat borrokan hasiko da.
‘La MAT’
MAT edo goi tentsioko linea batek Iberiar penintsula osoa zeharkatuko du Afrika iparraldetik Europaraino, eta Espainia eta Frantziako ekoizpen nuklearrari irtenbidea emateko balioko du.
‘Cuando la tierra llora’
Peruko urrea erauzteko enpresarik handienak giza eskubideak defendatzen dituen talde bati egindako jazarpena azaltzen du.
Egitaraua
IRUN
- Bihar: Amanece dignidad (Anna Castillo, 2011) eta Sucumbios, tierra sin mal (Arturo Hortas, 2011), Oky Doky tabernan.
- Etzi: The pipe. La tubería (Risteard O’ Domhnaill, 2010), 18:00etan, Oky Doky tabernan.
ERRENTERIA-ORERETA
- Bihar: The pipe. La tubería eta Sucumbios, tierra sin mal, 19:30ean, Mikelazulo kultur elkartean.
- Etzi: Cuando la tierra llora eta La MAT. A dónde nos lleva el progreso, 19:30ean, Mikelazulo kultur elkartean.
Oarso Bidasoko Hitza