Aisialdi egitasmo hezitzaile bat abian jartzeko proiektua aurkeztuko dute aste honetan eta hurrengoan
Pirritx, Porrotx eta Marimotots pailazoak kide dituen Irrien Lagunak klubaren ekimenez, Oarsoaldeko herrietan umeentzat aisia proiektu «hezitzaile, euskaldun, herritar eta parte hartzaile bat» abian jarri nahi dute. Proiektuaren protagonista umeak izango dira, baina ez dira jasotzaile huts izango, egitarauaren beraren diseinuan ere hartuko baitute parte.
Oarsoaldea Garapen Agentziaako kideek gogorarazi dutenez, ez da umeentzako mugatuta egongo den egitasmoa: «Gazteak eta helduak, gurasoak, irakasleak, umeen aisia taldeak, gazte mugimenduak, herri ekimenak, kultur, euskara, heziketa, kirol, natur taldeak, herriko eragileak, herriko udal eta erakundeak, eskolak, ikastolak, norbanakoak eta beste inplikatu nahi dira bertan».
Euskal komunitatea trinkotu
Hain zuzen, herrigintza sarea indartzea, euskal komunitatea trinkotzea, kultura sustatzea, parte hartze eta berdintasun ereduak sozializatu eta praktikan jartzea, eta herria biziberritzea dira egitasmoaren oinarri eta helburuak.
Irrien Lagunak Klubak eta HUHEZI fakultateko Sorguneak ikertegiak, Errenteria, Lezo, Oiartzun eta Pasaiako udalekin batera taxutu duten egitasmoa aste honetan eta hurrengoan aurkeztuko dute herriz herri.
Joxemari Agirretxe Porrotx eta Sorguneak ikertegiko kideak izango dira egitasmoa aurkezten. Bilerak irekiak izango dira eta gaiaren inguruan interesa duen banako, eragile, talde, erakunde, ekimen eta elkartek har dezakete parte.
Duela hiru urte martxan
Irrien Lagunak Klubak orain hiru urte zabaldu zituen ateak umeei aisialdirako euskarazko produktuak eskaintzeko asmoz. Webgunearekin (www.irrienlagunak.com) eta aldizkarirekin (Irria) plazaratu zen.
Geroztik, egitasmo gehiago jarri ditu abian, besteak beste, Zeraingo barnetegia eta urteroko Irrien Lagunen festa. Oarsoaldeko lau herritara ekarri nahi den egitasmo berri hori beste urrats bat da. Asmo berri honetan laguntzaile du Mondragon Unibertsitateko Sorguneak ikertegia.
Ikertegi horren lan eremua euskal kultura ikertu eta berau biziberritzeko estrategiak bilatzea da. Asier Mujika, Oarsoaldea Garapen Agentziako lehendakariak adierazi duenez, ekimen hori aurrera eramateko, udalerri bakoitzean batzorde bat osatuko dute, eta Oarsoaldea Garapen Agentziaren funtzioa batzorde horiek koordinatzea izango da. Eskualde mailako beste batzorde bat ere eratuko dute.
Bilera irekiak
- Oiartzun. Etzi, hilak 23.Udaletxeko areto nagusian, 17:30ean.
- Errenteria-Orereta. Astelehena, hilak 27. Xenpelar etxean, 18:30ean.
- Pasaia. Asteazkena, hilak 29. San Pedroko Udal aretoan, 19:00etan.
- Lezo. Datorren osteguna, martxoak 1. Kultura aretoan, 19:00etan.
Oarso Bidasoko Hitza