Oarsobidasoko Hitza

Eskifaia abesbatzak Zumaian abestuko du larunbatean, Olatu Talkaren barruan

Hondarribiko Hitza — Wed, 22 May 2013 15:40:59 +0000

Donostiak 2016an Europako Kultur Hiriburu izatea lortu duela eta, Olatu Talka jaialdiaren hirugarren edizioa antolatu du Donostia 2016 ekimenak. Dozenaka ekitaldi antolatu dituzte asteburu honetarako. Ekitaldi gehienak Donostian izango dira, baina ez guztiak. Hala, Hondarribiko Eskifaiak kontzertua eskainiko du larunbat honetan Zumaiako komentuan, 19:00etan, Itsasoaren ahotsak goiburuarekin. Eskifaiarekin batera Zumaiako San Pedro abesbatza igoko da Zumaiako komentuko oholtzara.

Xanistebanetako Jai Batzordearen bilera izango da bihar

Oiartzungo Hitza — Wed, 22 May 2013 15:31:21 +0000

Bihar, hilak 23, Xanistebanetako Jai Batzordearen bigarren bilera izango da. Manuel Lekuona bibliotekako beheko solairuan izango da, 19:00etan hasita.Hainbat elkarte zein eragile gauetako egitaraua osatzen hasi da eta beste batzuk ekimenak prestatzen hasi dira dagoeneko. Lehen bilera horretan parte hartu ez zuten elkarteei euren ordezkariak bilerara joatea dei egin die udalak.

PP: “Eskaera kulturalari erantzuteko udalak ez ditu zertan errenteriarrak zorpetu behar”

Errenteriako Hitza — Wed, 22 May 2013 15:00:50 +0000

Errenteriako Udalak Kultura arloan aurrera eraman nahi dituen egitasmoen harira, PSE-EE kontra azaldu ondoren, Errenteriako PPk ere bere desadostasuna agertu du. PPren iritziz, kultura eta sormen polo hori egun badago: “Udal gobernu taldeak herritarren kultura eta sormen eskaerari erantzuteko ez ditu zertan errenteriarrak zorpetu behar ia 8 milioi eurora iristen den kantitatearekin”.

Gaur goizean agerraldia egin dute Jose Manuel Herzog eta Maria Angeles Bastos PPko zinegotziek, eta Lekuona eta Torrekuako proiektuak izan dituzte hizpide. Lekuona eraikina berritzearen alde agertu da PP “kosten legearen menpe dagoela eta bestela galdu egingo litzatekeela kontuan hartuta”. Hala ere, iraingarritzat jo du udalak esatea Dantzagunea Lekuonan ez bada aldundiak ez diola 250.000 euroko diru laguntza emango “horrek udalari hasieran zehaztutakoa baino 30 aldiz handiagoa den kopurua gastatzera behartzen baitu”. Horrez gain, “kultur ekitaldiez gain, ekitaldi sozialak ere” hartu beharko lituzkeela iritzi dio: “Instalazio horrek bisitariak ekar ditzake herrira, mugimendu kulturalaz gain, ekonomikoa ere erakartzeko”.

Ez dago ados ere Lekuona berritu bitartean Dantzagunea kulturgunera eramatearekin: “Gogorarazi behar da bere garaian gune hori moldatzeak 1 milioi euroko gastua ekarri zuela, eta orain bi urteko erabilpen bat emateko ez dagoen diru bat gastatu nahi duela udalak (500.000 euro) orduan egin zena puskatuz”.

Torrekua
PPk adierazi du Torrekuan Jantzien Museoa egiteko Espainiako Gobernuak 3 milioi euroko diru laguntza bideratu zuela, baina erabaki horren ondorioak aztertu dituen galdetu dio gobernu taldeari. Horrez gain, Ereintzarekin Jantzien Museoaren gainean zein akordio lortu duen oraindik ez jakitea salatu du PPk. Torrekuan ere “hostel milioidun baten beharrik” ez dagoela esan du. Ildo horretatik, eskaintza publikoa indartzean pribatuak era gauza bera egiten duela azaldu du, eta Jantzien Museoa ikustearen aitzakiarekin jendeak gaua pasatzen geratuz gero, herria “bere kasa” hornituko dela.

Udal gobernu taldeak gauzak ongi aztertu gabe jokatu duela uste du PPk, eta zentzu horretan, hiru galdera egin dizkio: “Non daude kontuak? Zein diru sarrera beharko dira? Nondik aterako dira?”.

Lur Kortak ipuinak kontatuko dizkie etxeko ttikienei

Oiartzungo Hitza — Wed, 22 May 2013 15:00:32 +0000

Bihar (hilak 23) ikasturteko azken ipuin kontaketa saioa izango da, Lur Korta kontalari oiartzuarra izango da biharko saioaren gidari. 2-3 urteko haurtxoei zuzendutako ipuinak kontatuko ditu Kortak. Udaletxeko areto nagusian izango da hori, 17:30etik aurrera.

Kultura sailak hitzarmenak berritu ditu Lezoko lau eragilerekin

Lezoko Hitza — Wed, 22 May 2013 13:49:37 +0000

Kultura Sailak Hezikuntza Guraso elkartearekin, Munttar Txistulari Elkartearekin, Murixka dantza Taldearekin eta Orratx Nazerki Taldearekin zituen hitzarmenak berritu zituen atzo arratsaldean egin zuen sinadura ekitaldian. Mikel Arruti Kultura Zinegotzia eta Xanti Val Kultura teknikaria izan ziren ekitaldian, lau elkarteetako ordezkariekin batera. Hitzarmenaren bidez herri ekimenean lau talde horiek duten garrantziaren aitortza egiten diela udalak nabarmendu zuen Arrutik, “Lezoko kultur jardueretan talde horiek urteetan izan duten ibilbidearen garrantzia nabarmendu nahi dugu”.

Hitzarmena sinatuta, elkarteek hainbat betebehar izaten dituztela jakinarazi zuten bestalde. Besteak beste urtean zehar hainbat ekimen egin beharko dituzte taldeek. Udalak bere aldetik, diruz laguntzeaz gain, bere jabetzakoak diren lokalak uzten dizkie.

Hitzarmenen bidez, herriko elkarteak indartu eta haien biziraupena bermatuko duen oinarrizko baldintzak ziurtatu nahi dituztela azaldu zuten Arrutik eta Valek.

Lankidetza hitzarmenen artean zaharrena Orratx Antzerki taldearekin sinatutakoa dela azaldu zuen bestalde Valek, “199az geroztik berritzen joan dena”. Murixka Dantza taldearekin 2005ean sinatu zuten lehen aldiz; Hezikuntza Guraso elkartearekin, 2008an, eta Munttar Txistulari taldearekin estreinakoz sinatu zuten atzokoan.

Udal ordezkariek adierazi zutenez, “egoera ekonomikoa ez da oso airosoa. Hala ere aspaldi hasitako bideari jarraipena eman nahi diogu”.

Batzokiaren bermea udal aholkulariei jarraituta egin zutela esan du PSE-EEk

Errenteriako Hitza — Wed, 22 May 2013 13:46:50 +0000

Batzoki zaharraren orubearen espropiazioaren harira, prozesua bukatu izanarekin “pozik” agertu da Errenteriako PSE-EE, baina agerraldi horretan Julen Mendoza alkateak egin zituen adierazpenekin ez dator bat. Aurreko gobernuak espropiazio prozedurarengatik 2006an 200.000 euroko bermea utzi izanagatik, “arduragabea” izan zela esan zuen alkateak, udalaren egoera ekonomikoa orduan oraingoa baino “askoz hobea” zela iritzita. Zentzu horretan, Jose Angel Rodriguez PSE-EEko bozeramaileak erantzun dio udaleko zerbitzu tekniko eta juridikoen aholkua jarraitu zuela orduko gobernuak, “jaberik ez zegoenez, ez zegoelako behin-betiko akordiorik lortzeko aukerarik”. Rodriguezen iritziz, “asmo txarrez” egin zituen alkateak adierazpen horiek: “Bera zuzendaritzan lizentziatua eta Pasaiako Udaleko hirigintza aholkulari izanda kudeaketa horiek ezagutzen ditu, eta adierazpen horiek asmo txarrekoak izatea baino ezin da ulertu”.

Rodriguezek gogorarazi du udalak EAJrekin batzokiaren orubearen gainean lortu duen akordioan udalaren zenbait lokal EAJri ematea adostu dutela, eta udala lokal horien jabe “aurreko gobernuen kudeaketarengatik” izan dela iritzi dio. Euren “aurreko aholkulari politikoengatik” izango balitz, herriak ez lukeela inongo hirigintza ustiapenik izango” adierazi du.

Ogia euskaraz erosi eta saltzeko ekimena abiatu dute Oarsoaldean

Ikerne Zarate — Wed, 22 May 2013 13:24:56 +0000

Okindegi eta gozotegietan euskararen erabilera sustatzeko helburua duen ekimena abiatu dute Errenteria, Lezo, Oiartzun eta Psaiako udalek Oarsoaldeako euskara zerbitzuaren eskutik. Helburua bertako produktuak eta ogiak bereziki, euskaraz saldu eta erostea du kanpainak eta horretarako hainbat euskarri banatuko dituzte ekimenarekin bat egin duten lau herrietako merkatarien artean. Bertan hamalau produktu ohikoenen izenak euskaraz azaltzen dira. Panelez gain, okindegietako produktuen hiztegitxoa ere banatuko zaie saltokietako jabeei.

Hilabeteko ogiaren zozketa
Kanpainaren barruan bigarren ekimena ere antolau dute udalek eta Errenteriako Errenkoalde, Oiartzungo Iturri eta Pasaiako Laurak Bat merkataritza elkarteek. Udazkenean burutuko dute bigarren ekimen hori, urriaren 14tik azaroaren 3ra bitartean. Epe horretan okindegi gozotegietan bertako produktuak euskaraz eskatzen dituzten bezeroei txartelak emango dizkiete saltzaileek eta horietan datuak beteta hilabeteko ogiaren zozketan hartuko dute parte. Azaroaren 4an egingo da zozketa, establezimendu bakoitzeko irabazle bat aterako da eta boletoaren jabeak hilabeteko ogia establezimendu berean hartu beharko duela zehaztu dute antolatzaileek.

Momentuz lau udalerrietako 46 saltokik egin dute bat ekimenarekin, eta besteren batek bertan parte hartzeko interesa balu bere herriko euskara zerbitzura jo behar duela jakinarazi dute halaber lau udaletako ordezkariek.

16 urte elkarlanean

Merkataritzan eta ostalaritzan euskararen normalkuntza sustatzeko 16 urte daramatzatela elkarlanean azaldu du halaber Mikel Arrutik, Lezoko Kultura zinegotziak: “Urte horietan guztietan indarrean izan dugu, besteak beste, merkatariei eta ostalariei zuzendutako doako zerbitzu eskaintza, establezimenduetan euskararen presentzia handitzea helburu duena”. Orain hiru urtetik berriz, merkataritza sektore bat aukeratzen dute harekin ahalmen berezia egiteko, “elementu bereziren bat eskaintzen diegu eta ekimen deigarri eta erakargarria antolatzen dugu, horien bidez hizkuntza paisaia euskalduntzeak duen garratzia nabarmentzeko”. Hizkuntza paisaiak hizkuntza batek duen edo ez duen estatusaren berri emateaz gain saltoki bakoitzak hizkuntzarekiko eta ondorioz hiztunekiko duen begirunea erakusten duela nabarmendu dute ekimenaren antolatzaileek: “Herri batera edo establezimendu batera sartzen garenean, aurrena ikusten dena hori da. Beraz, oso garrantzitsua da hizkuntza paisaia euskaraz egotea”.

Lau udalerrietako merkataritza elkarteetako ordezkariek bezeroei zerbitzua euskaraz ematea “kalitatearen” ezaugarrid ela nabarmendu dute bestalde, “bezeroak mimatu egin behar ditugu, gustuko izan behar dute gure saltokia, eta hirretarako, tratu pertsonalizatua ematea da komertzio txikiaren erronka”.

Millesime 2013 Saria jaso du Gorka Txapartegik Madrilen

Hondarribiko Hitza — Wed, 22 May 2013 12:37:22 +0000

Txapartegi sukaldean lanean, asteleheneko sari banaketa ekitaldirako

Hondarribiko Alameda jatetxeko Gorka Txapartegi sukaldariak Chef Millesime 2013 saria jaso zuen astelehenean Madrilgo Hesperia hotelean egindako ekitaldian. Berarekin batera, Quique Dacosta, Angel Leon, Jordi Cruz, Ricardo Sanz eta Nacho Manzano sukaldariek jaso zuten saria. Sariko antolatzaileek Espainiako Estatua sei eremutan banatu dute eta eremu bakoitzeko saridun bat hautatu dute.

“Gure jatetxea familia-jatetxea da eta gurea hirugarren belaunaldia da. Horregatik, etxean jasotako maitasuna partekatu nahi dugu jatetxean. Hemen egotea saria da guretzat eta saria konpainia honekin jasotzeak, handiago egitean du sentitzen duguna”, esan zuen Txapartegik saria jaso eta gero.

Kukairen ‘Out-In’, larunbatean, Irungo Amaian

Irungo Hitza — Wed, 22 May 2013 12:35:11 +0000

Amaia Kultur Zentroan emango du Out-In lana Errenteria-Oreretako Kukai Dantza Konpainiak, larunbatean, 20:00etatik aurrera. Sarrera orokorraren prezioa zazpi eurokoa da, eta honako tokietan lor daitezke: Turismo Bulegoan, Amaia Kultur Zentroan (emanaldiaren egunean), eta Internet bidez (7,70 euroan).

Karrikan lanaren (2011koa da) garapena da Out-In, 60 bat minutukoa. Kaleko lana zen Karrikan, eta hori aretora egokituta, Out-In sortu zuten. Bertan, hainbat estilo lantzen dituzte errenteriarrek.

Fitxa

Egitasmoaren zuzendaria: Jon Maya.
Koreografia: Damian Muñoz, Virginia Garcia eta Iker Gomez.
Dantzariak: Alain Maya, Eneko Gil, Ibon Huarte, Jon Maya, Nerea Vesga eta Urko Mitxelena.
Argiztapenaren diseinua: Javi Ulla.
Soinu teknikoa: Angel Aguero.
Jantziak: Vialis, Loreak Mendian.
Produkzioa: Kukai Dantza Konpainia.
Banaketa: Julio Perugorria Producciones.

Cesc Gelaberten dantza emanaldia, kulturgunean

Errenteriako Hitza — Wed, 22 May 2013 12:27:49 +0000

Cesc Gelabert dantzari eta koreografoak V.O azken lana aurkeztuko du, etzi, 19:00etan, Errenteria Hiria Kulturgunean. Hiru solo aurkeztuko ditu, eta zenbait pieza zahar birplanteatu: “Lehenaldiari begirada bat etorkizunera begira dagoen orainalditik”, aurreratu dute.

Piezekin batera, zenbait iruzkin egingo ditu dantzariak, obraren erreferentziak, iruzkin pertsonalak, esanahiari buruzko azalpenak, dantzari buruzko ideia orokorrak…

Hona hemen aurrerapen bat: